ინგლისურ-ქართული სამხედრო ლექსიკონი

2008 წლიდან დავიწყეთ ფიქრი ტერმინოლოგიური ლექსიკონების შექმნაზე. როგორც უკვე დავწერე, მე ინგლისურ-ქართულ ტერმინოლოგიაზე ვიმუშავე 12 წელი,  1996 წლიდან კი შეიქმნა ტერმინოლოგიური კომისია, რომელიც მხოლოდ ტერმინებზე მუშაობდა.

თავდაპირველად სამხედრო ლექსიკონის შედგენა გადავწყვიტეთ, რადგან ჩვენს დიდ ლექსიკონში ბევრი სამხედრო ტერმინია შეტანილი. ამ პროექტის შესახებ ცნობილი იყო ბაკურ სულაკაურისათვის. სწორედ ბაკურ სულაკაურის რეკომენდაციით მოგვმართა 2009 წელს თავდაცვის სამინისტრომ და ინგლისურ-ქართული სამხედო ლექსიკონის შედგენა გვთხოვა. ამ ლექსიკონის ერთ-ერთი ინიციატორი იყო ბატონი მამუკა ხერხეულიძე, რომელიც იმხანად თავდაცვის სამინისტროში მუშაობდა, მინისტრი კი იყო ბატონი დათო სიხარულიძე.

ეს პროექტი დაიგეგმა როგორც 6-თვიანი პროექტი, შემდეგ კი მასზე მუშაობა უნდა გაგრძელებულიყო. ბატონი მინისტრი პირადად შემხვდა და დავსახეთ მომავალი თანამსრომლობის გეგმები.

6 თვეში შეიქმნა 9 400 სიტყვა-სტატია. სამწუხაროდ, ისეტი ტემპით დაიწყო თავდაცვის მინისტრების ცვლა, რომ ლექსიკონი არავის გახსენებია. წიგნად ეს ლექსიკონი ვერ დაიბეჭდა, მაგრამ ჩვენ შევქმენით პირველი ელექტრონული ლექსიკონი, რომელიც თავდაცვის სამინისტროს და სამხედრო აკადემიას გადავეცით. მოგვიანებით შეიქმნა ლექსიკონის ონლაინ-ვერსია და ის განთავსებულია ინტერნეტში მისამართზე: http://mil.dict.ge

გვახარებს ის, რომ ამ ლექსიკონს აქტიურად იყენებენ: სამხედრო აკადემია, ჩვენი შეიარაღებული ძალები, განსაკუთრებით საერთაშორისო მისიებში მყოფი ჩვენი სამხედროები.

****

ახლა მოკლედ თავად ლექსიკონის შესახებ.

ლექსიკონში შეტანილია თანამედროვე ამერიკული, ბრიტანული და საერთაშორისო საბაზო 9 400 ტერმინი ისეთი სფეროებიდან, როგორიცაა: ტაქტიკა, ოპერაციები, მანევრები, წვრთნები, შენაერთები, პერსონალი, წოდებები, ტრანსპორტი, იარაღი, აღჭურვილობა, ლოგისტიკა და სხვა. ლექსიკონში სამხედრო ტერმინებთან ერთად წარმოდგენილია საავიაციო, საზღვაო, რადიო, ტექნიკური, კარტოგრაფიული, აგრეთვე სამხედრო-პოლიტიკური და ნატოსთან დაკავშირებული ტერმინები.

ლექსიკონში ასახულია რიგი სამხედრო-ისტორიული ტერმინებისა, იმ პირთათვის, რომლებსაც სამხედრო ლიტერატურასთან უწევთ მუშაობა. ლექსიკონში შეტანილია სამხედრო სასაუბრო და სლენგური სიტყვები და გამოთქმები იმ სამხედრო მოსამსახურეებისათვის, რომელთაც უცხოელ კოლეგებთან უხდებათ ურთიერთობა სხვადასხვა საერთაშორისო სამშვიდობო თუ სამხედრო ოპერაციებში მონაწილეობისას. ლექსიკონში შესულია სამხედრო სფეროში ყველაზე გავრცელებული აბრევიატურები.

ლექსიკონს დართული აქვს აბრევიატურების ინდექსი, აგრეთვე სამხედრო წოდებების, ძირითად საზომ ერთეულთა და დროის აღრიცხვის დანართები.

შემდგენლები: თინათინ მარგალიტაძე (რედაქტორი), გიორგი მელაძე, გელა ხუნდაძე

კონსულტანტები: კაპიტანი გიორგი ყალიჩავა, კაპიტანი კახა ჭაფოძე (თავდაცვის ეროვნული აკადემია), დოქტრინების შემუშავების სამმართველოს მთარგმნელები, ქალბატონები: თამარ კირვალიძე და მანანა სეხნიაშვილი (თავდაცვის ეროვნული აკადემია), დოქტორი რობერტ ხაჩიძე (სახელმწიფო სამხედრო სამეცნიერო-ტექნიკური ცენტრი "დელტა").

ვებ დიზაინი და პროგრამირება: გიორგი ქერეჭაშვილი

 

 

 

 

 

 

 

 

 

 

 

 

 


 

 

 
დასავლეთ ევროპული ენების ინსტიტუტი 2020 წ. | დიზაინი და პროგრამირება: კობა თირქია